دەربارەی دیداری یەکێتیی

دیداری یه‌كێتی چییه‌؟
یه‌كێتیی نیشتمانیی كوردستان له‌ بنه‌ڕه‌تدا پڕۆژه‌ی كۆمه‌ڵه‌ رۆشنبیرێكی سیاسیی گه‌له‌كه‌مان بوو بۆ وه‌ڵامدانه‌وه‌ی واقعی پڕ نائومێدیی كوردستان دوای ساڵی ١٩٧٥. ئه‌وكات سیاسه‌تمه‌داره‌ رۆشبیره‌كانمان به‌ دیدێكی نوێ و سه‌رده‌میانه‌ وه‌ڵامی كێشه‌ و پرسیاره‌كانی ئه‌وسای كۆمه‌ڵگای كوردستانیان دایه‌وه‌، وه‌ڵامدانه‌وه‌یه‌كی ئه‌وتۆ كه‌ بووه‌ هۆی به‌رپاكردنی .شۆڕش و سه‌ره‌نجام راپه‌ڕین و گه‌یشتنی گه‌له‌كه‌مان به‌ئازادی ورزگاربوون له‌ ده‌سه‌ڵاتی دیكتاتۆری به‌عس

به‌ڵام دوای تێپه‌ڕبوونی نزیكه‌ی نیو سه‌ده‌ له‌ به‌رپاكردنی شۆڕش و هه‌وه‌ها زیاتر له‌ ٣٠ ساڵ به‌سه‌ر به‌ر‌پاكردنی راپه‌ڕین، كۆمه‌ڵگای كوردستان گۆڕانكاریی كۆمه‌ڵایه‌تی و سیاسی و ئابوری گه‌وره‌ی به‌خۆوه‌ بینیوه‌، له‌ ئێستادا قۆناخی نوێی سیاسی-كۆمه‌ڵایه‌تی دروست بووه‌ كه‌ پێویستی به‌ خوێندنه‌وه‌ی نوێ و پرسیار و وه‌ڵامدانه‌وه‌ی نوێ هه‌یه‌. هه‌ر قۆناخێكی سیاسی جیاوازیش پرسیاری نوێ و داخوازی جیاواز دێنێته‌ كایه‌وه‌، بۆیه‌ پێویسته‌ به‌پێی قۆناغه‌كان وه‌ڵامی یه‌كێتییانه‌مان بۆ ئه‌رك و هه‌لومه‌رج و پرسیاره‌ نوێكان گه‌ڵاڵه‌ بكه‌ین‌‌.
له‌م سۆنگه‌یه‌وه‌، له‌ گۆشه‌نیگای هه‌ستكردنی قوڵمان به‌ ئه‌ركی نوێی مێژوویی و به‌رده‌وامی یه‌كێتی، به‌ پێویستمان زانی بۆ سه‌رله‌نوێ داڕشتنه‌وه‌ی دید و سیاسه‌ت و وه‌ڵامی نوێی یه‌كێتییانه‌ بۆ پرس‌ و كێشه‌ نوێكان و ئه‌و پرسیارانه‌ی كه‌ رۆژانه‌ ڕووبه‌ڕووی كادیرانمان ده‌بنه‌وه، گفتوگۆیه‌كی فراوانی هه‌ڤاڵانه‌ ده‌ستپێبكه‌ین كه‌ تیایدا سێكته‌ره‌ جیاوازه‌كانی كۆڕی تێكۆشان و بونیادنانه‌وه‌ی كۆمه‌ڵگای ئێستای كوردستان بخه‌ینه‌ به‌ر باس و توێژینه‌وه‌، كه‌ ده‌ره‌نجامه‌كه‌ی له‌ دیدارێكی چه‌ند رۆژیدا هێڵه‌ سه‌ره‌كییه‌كانی دید و سیاسه‌ت و پڕۆژه‌كانی یه‌كێتی بۆ گه‌شه‌پێدانی سیاسی و ئابوری و كۆمه‌ڵایه‌تی و كه‌لتوری كۆمه‌ڵگای كوردستان و عێڕاق ده‌ستنیشان بكه‌ین.

ئه‌م دیداره‌ بانگه‌وازێكی هه‌ڤاڵانه ‌و نیشتمانییانه‌یه‌ بۆ تاوتوێكردن و خوێندنه‌وه‌ی نوێ بۆ واقعی ئێستای یه‌كێتی، بۆ نوێكردنه‌وه‌ی گوتاری سیاسی و كۆمه‌ڵایه‌تی و گه‌شه‌پێدانی دنیابینیه‌كه‌ی، هەتا بتوانین به‌‌ دیدگایه‌كی نوێوه‌ په‌ره‌ به‌ ئه‌ركی خزمه‌تكردنی كۆمه‌ڵانی خه‌ڵك و خاكی كوردستان بده‌ین.
له‌م چواچێوه‌یه‌دا( دیداری یه‌كێتی) ده‌یه‌وێ چه‌ندین ته‌وه‌ری جێی بایه‌خی ئێستا و ئاینده‌ی حیزبه‌كه‌مان، پێداویستی و كێشه ‌و پێشهاته‌كانی كۆمه‌ڵگه‌كه‌مان و ئه‌زمونی سیاسیی گه‌له‌كه‌مان تاوتوێ بكات، چونكه‌ پێشهات و گۆڕانكارییه‌كانی كۆمه‌ڵگە و سه‌رده‌م له‌ ئاستی كوردستان و ده‌ره‌وه‌شدا ئه‌م هه‌وڵ و كۆششه‌ تازه‌یه‌ ده‌خوازێت، یه‌كێتیش وه‌ك هه‌میشه‌ گرنگه‌ سه‌رقافڵه‌ و ده‌سپێشخه‌ری سه‌ره‌كی ئه‌م گۆڕانكارییانه‌ بێت.

بۆ ئه‌م مه‌به‌سته‌ چه‌ندین لیژنەی تایبه‌ت به‌ ته‌وه‌ر و پرسه‌ سه‌ره‌كییه‌ پێویستییه‌كان دروست كراوه‌ و له‌ ڕێی سه‌ردان و دیدارو كۆبوونه‌وه‌ ڕاوبۆچونی هه‌ڤاڵان و دۆستانی یه‌كێتی وه‌رده‌گیرێ و كۆده‌كرێنه‌وه‌ و رێكده‌خرێنه‌وه‌، به‌ مه‌به‌ستی ئاماده‌كردنی راپۆرت و پلان بۆ دیداره‌ گه‌وره‌كه‌ی یه‌كێتی، تا هه‌ڤاڵانی به‌شدار له‌م دیداره‌ به‌ گیانێكی به‌رپرسانه‌ و بە ئامانجی ده‌ستنیشانكردنی كێشه ‌و كه‌موكوڕییه‌كان و چاره‌سه‌ركردنیان به‌شداری جددی و كاریگه‌ر بكه‌ن له‌ چاره‌نوسی ئێستا و ئاینده‌ی یه‌كێتی و گه‌له‌كه‌مان.

ژمارەی سەردان:
© دیداری یەکێتی - 2023 - مافی بڵاوکردنەوەی پارێزراوە.
chevron-down linkedin facebook pinterest youtube rss twitter instagram facebook-blank rss-blank linkedin-blank pinterest youtube twitter instagram