ئارمانجێن دیدارا ئێكەتی
ئیمان ئامێدی
پەڕلەمانتار و ئەندامی ئەنجومەنی سەرکردایەت
سازدانا دیدارا ئێكەتی بڕیارەكا ژیرانە و پێدڤییەكا هەنوكەیی بوو سەركردایەتییا ئێكەتی نیشتمانی كوردستان دای، كو مەرەم ژێ نووكرنا دید و بۆچوون و سیاسەتا ئێكەتی نیشتمانییە دهەموو بوار و جومگەهێن جڤاك و بڕیڤەبرنا حوكمڕانی و كارێ حزبیدا، و ل گورەی ڤێ پێنگاڤێ پێڤدییە ئێكەتی شیانێن خۆ باشتر و بەرفرەهتر لێبكەت پێخەمەت خزمەتكرنا خەلكێ عیراقێ بگشتی و خەلكێ هەرێما كوردستانێ بتایبەتی و گۆمان تێدا نینە كو نووكرنا ئێكەتی دێ ڕەهەندێن خۆ یێن ناڤخۆیی و دەرەكی ژی هەبن.
ل سەر هەردوو ئاستێن هەرێمێ و عیراقێ، بڕیارا سازدانا دیدارێ دقۆناغەكا هەستیارا ئێكەتی نیشتمانیدا هاتەدان، ژبەركو پشتی چەندین ساڵێن سستیێ دبوارێ هەڵسەنگاندن و ڕەخنە ل خۆگرتنێ و لاوازبوونا بنەمایێن سیاسی و كۆمەڵایەتی، ئێكەتی پێنگاڤا ڤەژاندن و نووكرنا دید و نێڕینێن خۆ یێن ستراتیژی دا، ڕەنگە ئەڤ پرسە بۆ هندەك حزب و لایەنێن سیاسی كو چەندین ساڵان د ڕەوشەكا ژ وی شێوەیدا دەربازكربن یا ئاسایی بیت، بەلێ بۆ ئێكەتی نیشتمانی كو دبنەكوكدا ل سەر بنەما و بیروباوەرەكا فرەهـ هزری و ئایدلۆژی هاتییە دامەزراندن سوسیال دیمۆكرات كرییە شوناسا خۆ یا هزری و سیاسی، نەیا ئاسایی یە دڤێ قۆناغا هەستیار و وەرچەرخانا دیروكیدا وان بنەمایان ژدەست بدەت و دهەمان دەمدا بیر ل سەركەفتنێ بكەت دبوارێن سیاسی و حوكمڕانی و ئیداریدا.
هەبوون و دەستبكاربوونا سەركردایەتییا نوویا ئێكەتی نیشتمانی كو دڤێ قۆناغێدا ب ئاشكرا پێنگاڤان بەرەڤ گوهڕینان دهاڤێژیت، ئەگەرەكێ گرنگە بۆ خورتكرن و بسەرخستنا پڕۆسێن چاكسازیێ.
كەواتە یا گرنگە دیدارا ئێكەتی ب ڕژدی و هووربینی رێ و شێوازێن نووكرنا گشت جومگەهـ و سازیێن خۆ یێن حزبی دگەل پێشهاتێن سەردەمانە نوو بكەت، دا بشێت ژلایەكیڤە ئارمانجێن خۆ یێن حزبی و سیاسی بپێكیت، ژلایەكێ دیڤە بهێزتر و ل ئاستەكێ شارەزا بەشداری پڕۆسا سیاسییا عیراقێ ببیت و ببیتە هۆكارێ مسوگەركرنا گوهرین و بدەستڤەئینانا ماف و داخوازیێن جڤاكی و دووبارە نەهجێ سەرۆك مام جەلال و سیاسەتا وی یا (چەپكە گول) بۆ خەلكێ عیراقێ بگشتی و هەرێما كوردستانێ بتایبەتی بەرچاڤ و شڕۆڤە بكەت، ل سەر هەردوو ئاستێن ئەقلیمی و جیهانی ژی ئێكەتی ببیتە پێشڕەو د ئەنجامدانا گوهڕینان.
پێدڤییە ئێكەتی نیشتمانی پێداچوونەكا ڕژد و سەردەمانە دسەرجەم بۆچوونێن خۆ یێن سیاسی و ستراتیژیدا بكەت، بەرنامە و پڕۆژێن نووی بۆ چارەسەركرنا كێشە و گرفتێن نیشتمانی و نەتەوی داڕێژیت، نەخاسم بۆ چارەسەركرنا كێشەیێن دەڤەرێن ڤەقەتیایی و سیستەمێن حوكمڕانی و سیاسی و ئابووری ل هەرێما كوردستانێ و شێوازێ پەیوەندیێن هەرێما و كوردستانێ و حكومەتا فیدرالی.
پێدڤییە ب گەشكرنا گیانێ خەباتێ دناڤ بەرەبابێن نوویدا، و چاندنا هەستێ حەژێكرنێ بۆ كوردستانێ و ژیانێ و خزمەتكرنا مرۆڤاتیێ، دیدارا ئێكەتی ببیتە وێستگەهەكا ڕاستەقینە بۆ نووكرنا ئێكەتیێ وەكو هێزەكا سیاسی و ببیتە فاكتەرەكێ كاریگەر و ئەرێنی بۆ گەشەپێدانا جڤاكێ عیراقی و كوردستانی و پێشڤەبرنا پڕۆسێن سیاسی، ب وێ چەندێ ئێكەتی وەكو سەرمایەكێ ڕاستەقینە و یاریكەرەكێ خودان سەنگێ سیاسی دێ ڤەگەڕیتە دگۆڕەپانا حوكمڕانیێ دا ل عیراقێ و ل هەرێما كوردستانێ.
